Klos – Policia ka zbardhur dinamikën e aksidentit të rëndë të ndodhur në orët e para të mëngjesit në Klos, në vendin e quajtur “Ura e Halilit”, në fshatin Dars, ku një automjet tip Audi ka dalë nga rruga dhe ka përfunduar në përrua.

Sipas njoftimit zyrtar të Policisë, është arrestuar drejtuesi i mjetit, shtetasi A. L., 24 vjeç, banues në fshatin Fullqet të Klosit. Ai dyshohet se, pas aksidentit, është larguar nga vendngjarja pa njoftuar autoritetet dhe pa i dhënë ndihmë pasagjerit që ndodhej në automjet.

Nga veprimet hetimore rezulton se në mjet ndodhej edhe një pasagjer, shtetasi J. K., 30 vjeç, po nga fshati Fullqet, i cili dyshohet se është marrë nga rrjedha e përroit dhe rezulton ende i humbur.

Ngjarja është raportuar rreth orës 01:30, ndërsa në vendngjarje kanë mbërritur menjëherë shërbimet e Policisë dhe zjarrfikësit. Gjatë veprimeve të kryera, u bë i mundur identifikimi dhe arrestimi i drejtuesit të mjetit.

Sipas Policisë, 24-vjeçari iu nënshtrua testit të alkoolit, nga i cili rezultoi se po drejtonte automjetin në gjendje të dehur.

Ndërkohë, polumbarët e RENEA-s, shërbimet e Policisë dhe zjarrfikësit vijojnë kërkimet intensive përgjatë përroit të fshatit Dars për gjetjen e trupit të 30-vjeçarit.

Materialet procedurale i janë referuar Prokurorisë për veprime të mëtejshme ligjore.