Njësia për Krime Ekonomike e Policisë së Kosovës, në koordinim me Prokurorinë Themelore në Prizren, po zhvillon një aksion të gjerë në disa rajone të vendit.

Kryeprokurori i Prokurorisë Themelore në Prizren, Petrit Kryeziu, konfirmoi shkurt për Radion Evropa e Lirë se aksioni përfshin mbi 40 persona të dyshuar, pothuajse në të gjitha rajonet e Kosovës.

Sipas raportimeve të Betimi për Drejtësi, një platformë e specializuar për sundimin e ligjit, gjatë operacionit janë arrestuar disa persona në rajonet e Prizrenit, Prishtinës, Pejës, Gjilanit, Ferizajt, Mitrovicës dhe Gjakovës.

Në mesin e të arrestuarve, sipas të njëjtave burime, janë Sami Mazreku, ish-drejtor i Byrosë Kosovare të Sigurimeve, si dhe Valon Berisha, ish-drejtor i Financave në këtë institucion.

Burimet bëjnë të ditur se aksioni lidhet me dyshime për kryerjen e veprave penale si: keqpërdorim i besimit, keqpërdorim i autorizimeve ekonomike, ndihmë në keqpërdorim të besimit dhe falsifikim i dokumenteve.

Në operacion janë angazhuar një numër i konsiderueshëm prokurorësh dhe zyrtarësh policorë, ndërsa autoritetet pritet të japin detaje shtesë pas përfundimit të veprimeve hetimore.