TIRANË – 7 Janar 2026 Reshjet e dendura të shiut kanë shkaktuar përmbytje të konsiderueshme në disa zona të vendit, duke prekur veçanërisht qarqet e Durrësit dhe Lezhës, ku janë raportuar rrugë të bllokuara, banesa të përmbytura dhe dëme të shumta në infrastrukturë.

Në Tiranë, situata paraqitet shqetësuese përgjatë lumit Lana, i cili është fryrë ndjeshëm dhe ndodhet në prag të daljes nga shtrati. Zona më problematike raportohet pranë pallatit me shigjeta, ku niveli i ujit ka arritur kuota alarmante.

Ndërkohë, situatë e rënduar paraqitet edhe në Novoselë, ku niveli i lumit Vjosë ka arritur në 8 metra. Sipas specialistëve, mbi kuotën 8.5 metra, lumi nis përmbytjen e zonave përreth, duke shtuar ankthin dhe frikën tek banorët.

Autoritetet bëjnë me dije se gjendja mbetet kritike, pasi prurjet nga Përmeti dhe Memaliaj vijojnë të jenë të larta. Përkeqësimi i situatës është ndikuar edhe nga era bregdetare, e cila ka penguar derdhjen normale të lumit në det, duke rënduar më tej situatën hidrike.

Banorët e zonave të prekura shprehen të indinjuar, duke theksuar se kjo situatë përsëritet prej vitesh dhe, sipas tyre, mungojnë masat konkrete për parandalimin dhe menaxhimin e përmbytjeve.