Gjykata e Shkallës së Parë e Juridiksionit të Përgjithshëm Tiranë ka shpallur fajtor Isuf Hasën për vrasjen e fqinjit të tij, 81-vjeçarit Xhemal Meta, duke e dënuar me 25 vite burg. Vendimi parashikon që dënimi të vuhet në një institucion të sigurisë së lartë dhe të llogaritet nga data e ndalimit të tij, më 15 janar 2025.

Ngjarja e rëndë ndodhi më 13 janar 2025 në fshatin Qafë-Mollë të Tiranës. Viktima u gjet i pajetë në oborrin e banesës nga një fqinj tjetër, ndërsa ekspertiza mjeko-ligjore konstatoi plagë të rënda në kokë të shkaktuara nga goditje me mjet të fortë, të cilat rezultuan fatale.

Gjatë hetimeve dhe procesit gjyqësor, Isuf Hasa pranoi autorësinë e krimit. Sipas prokurorisë, motivi kryesor i vrasjes ishte grabitja e parave të viktimës, të cilat autori synonte t’i përdorte për shlyerjen e një mikrokredie. Për këtë arsye, akuza fillestare e “vrasjes me dashje” u rikualifikua në “vjedhje me pasojë vdekjen”, vepër për të cilën gjykata e shpalli fajtor.

Nga aktet hetimore rezultoi se ditën e ngjarjes, Hasa ishte ndalur në banesën e fqinjit për të pirë kafe. Pas rreth 15 minutash qëndrimi, në momentin që po dilnin nga shtëpia, ai e ka goditur 81-vjeçarin me çekiç në kokë, duke e rrëzuar në tokë. Pasi është siguruar se viktima nuk lëvizte më, ka marrë portofolin e tij dhe është larguar nga zona. Armën e krimit e ka marrë me vete dhe e ka fshehur pranë banesës së një prej vajzave të tij, ku më pas u gjet dhe u sekuestrua nga policia.

Në dëshmitë e dhëna gjatë hetimit, Hasa ka deklaruar se kishte konflikte të mëparshme me viktimën, duke pretenduar se ai e kishte fyer dhe provokuar në mënyrë të përsëritur, përfshirë komente ndaj bashkëshortes së tij. Megjithatë, gjykata vlerësoi se këto pretendime nuk përbëjnë rrethana lehtësuese dhe se veprimet e autorit tregojnë qartë një qëllim përfitimi material.

Trupi gjykues, duke analizuar provat, rrëfimin e të pandehurit dhe pasojat e rënda të krimit, vendosi dënimin me 25 vite burg, duke e cilësuar çështjen si një nga rastet më të rënda të dhunës kriminale të ndodhura në zonë gjatë vitit të fundit.