Pas një muaji hetime me metoda proaktive, Policia e Fierit finalizoi operacionin e koduar “New Start 2”, duke zbuluar një arsenal armësh dhe sasi të konsiderueshme droge në fshatin Suk, Roskovec.

Në kuadër të operacionit, u arrestua shtetasi A. H., 34 vjeç, i dyshuar për shitje të lëndëve narkotike. Gjatë kontrollit të automjetit të tij, u gjet rreth 1 kg kanabis sativa, e ndarë në doza gati për shitje.

Kontrollet e mëtejshme në banesën dhe lokalin në pronësi të tij dhe të babait të tij çuan në sekuestrimin e 17.6 kg kanabis sativa, 2 armë pistoletë, 2 armë automatike, 2 granata luftarake, 1110 fishekë të kalibrave të ndryshëm, si dhe disa aparate celularë dhe një motomjet.

Gjatë veprimeve u arrestua edhe babai i tij, shtetasi A. H., 61 vjeç. Policia në bashkëpunim me Prokurorinë e Fierit po vijon hetimet për dokumentimin ligjor të plotë të këtij rasti, ndërsa materialet iu referuan prokurorisë për veprat penale “Prodhimi dhe shitja e narkotikëve” dhe “Mbajtja pa leje dhe prodhimi i armëve shpërthyese dhe municionit”.