Fier, 6 janar 2026

Policia e Fierit ka zhvilluar mbrëmjen e sotme një operacion të befasishëm, gjatë të cilit janë sekuestruar dy armë zjarri dhe një sasi lënde narkotike e dyshuar si kanabis.

Burime zyrtare bëjnë me dije se gjatë kontrolleve të ushtruara, uniformat blu kanë shoqëruar një person, i cili po merret në pyetje për veprime të mëtejshme procedurale.

Sipas policisë, operacioni është pjesë e kontrolleve të shtuara për goditjen e veprimtarive kriminale dhe mbajtjen pa leje të armëve të zjarrit. Hetimet vijojnë për të zbardhur plotësisht rrethanat e rastit, si dhe për të verifikuar nëse personi i shoqëruar ka qenë i përfshirë në aktivitete të tjera të paligjshme.

Materialet procedurale pritet t’i referohen Prokurorisë për veprime të mëtejshme ligjore.