Maduro para gjykatës në SHBA: “Jam i pafajshëm, më rrëmbyen, jam ende president i vendit tim”

Udhëheqësi i rrëzuar i Venezuelës, Nicolás Maduro, u paraqit të hënën për herë të parë para një gjykate federale amerikane në Nju Jork, ku u deklarua i pafajshëm për akuzat e rënda federale që përfshijnë narkoterrorizëm dhe trafik droge.

“Jam i pafajshëm. Nuk jam fajtor. Jam një njeri i mirë, presidenti i vendit tim”, i tha Maduro gjykatësit gjatë seancës, duke folur në spanjisht përmes një përkthyesi.

Maduro u soll në Shtetet e Bashkuara pas një operacioni ushtarak amerikan në Karakas, dy ditë më parë, operacion që administrata Trump e justifikoi me akuzat penale ndaj tij. Ai këmbënguli para gjykatës se ishte “rrëmbyer” dhe se ende e konsideron veten president legjitim të Venezuelës.

Seanca paraprake në Manhattan

Seanca u zhvillua në një sallë gjyqi federale në Lower Manhattan, përpara gjyqtarit 92-vjeçar Alvin Hellerstein, i cili e njohu Maduron zyrtarisht me akuzat. I veshur me uniformë blu burgu mbi rrobat portokalli të të paraburgosurve, Maduro u deklarua i pafajshëm për të gjitha akuzat.

Në të njëjtën seancë, edhe bashkëshortja e tij, Cilia Flores, u deklarua e pafajshme. Ajo u paraqit me një këmishë blu të errët burgu dhe kishte një fashë në ballë, si dhe shenja që ngjanin me mavijosje pranë syrit të djathtë. Flores i tha gjykatës se ishte “plotësisht e pafajshme”.

Tensione në sallën e gjyqit

Në fund të seancës, një person nga galeria u ngrit dhe i tha Maduron në spanjisht se “do të paguante për krimet e tij”. Maduro reagoi duke deklaruar se do të fitonte lirinë dhe e shpalli veten “rob lufte”.

Akuzat ndaj tij përfshijnë narkoterrorizëm dhe komplot për importimin e kokainës në Shtetet e Bashkuara. Sipas autoriteteve amerikane, këto akuza janë pjesë e një fushate njëmujore të administratës Trump për largimin e tij nga pushteti.

Betejë e gjatë ligjore

Gjyqi pritet të mos nisë së shpejti. Sipas avokatëve, mund të duhen më shumë se një vit para se çështja të shkojë në gjykim të plotë. Avokati i Maduron, Barry Pollack – një penalist i njohur që ka përfaqësuar edhe Julian Assange – ngriti në sallë pikëpyetje serioze mbi ligjshmërinë e “rrëmbimit ushtarak” të klientit të tij nga territori venezuelian.

Pollack i tha gjykatës se Maduro nuk po kërkon lirimin me kusht në këtë fazë, por se kjo mund të ndodhë në një moment të mëvonshëm të procesit.

Seanca e radhës gjyqësore është caktuar për 17 mars, kur Maduro dhe bashkëshortja e tij do të duhet të paraqiten sërish përpara gjykatës federale në Nju Jork. /noa.al me të dhëna nga AP, Nytimes, NyPost.