Tiranë, 5 Janar 2026

Kryetari i Partisë Demokratike, Sali Berisha, deklaroi se opozita nuk do të diskutojë asnjë emër për kryeministër teknik pa u arritur më parë një marrëveshje politike për krijimin e një qeverie teknike.

Duke folur për mediat, Berisha theksoi se Partia Demokratike mbetet e vendosur në kërkesën e saj për një qeveri teknike, e cila sipas tij është e domosdoshme për garantimin e një procesi zgjedhor të drejtë dhe të ndershëm.

“Partia Demokratike insiston dhe do të insistojë për një qeveri teknike për përgatitjen e një procesi të drejtë zgjedhor. Partia Demokratike nuk avancon as edhe një emër pa u arritur marrëveshja për qeverinë teknike. Pasi të arrihet marrëveshja për qeverinë teknike, pa diskutim PD do të avancojë ose do të paraqesë propozimet e veta krahas forcave të tjera politike”, deklaroi Berisha.

Sipas tij, çdo diskutim për emra konkretë është i parakohshëm dhe i pavlefshëm pa një konsensus paraprak për modelin e qeverisjes që do të garantojë standarde demokratike në zgjedhje.