Gjirokastër, 1 janar 2026 Një aksident tragjik rrugor ka ndodhur në orët e para të mëngjesit në aksin Gjirokastër–Tepelenë, në vendin e njohur si “Bypass”, duke shkaktuar humbjen e tre jetëve dhe plagosjen e rëndë të një vajze të re.

Sipas informacioneve zyrtare, nga përplasja e dy automjeteve kanë humbur jetën Klejdi Myftari, 24 vjeç, dhe Anxhelo Ruci, 28 vjeç, të cilët udhëtonin me një automjet tip Volkswagen, si dhe Martin Dulaj, 26 vjeç, drejtues i një automjeti tip Mercedes Benz. Të tre viktimat kanë ndërruar jetë si pasojë e plagëve të marra nga përplasja e fortë.

Në aksident ka mbetur e plagosur rëndë edhe Arsida Demiri, 20 vjeçe, e cila është transportuar me urgjencë drejt Spitalit të Traumës në Tiranë për ndihmë më të specializuar mjekësore. Sipas burimeve spitalore, ajo ndodhet jashtë rrezikut për jetën.

Policia e Gjirokastrës ka konfirmuar se aksidenti ka ndodhur rreth orës 03:18, kur automjeti që drejtohej nga shtetasi M. D., 25 vjeç, është përplasur me automjetin e drejtuar nga shtetasi K. M., 24 vjeç. Si pasojë, kanë humbur jetën të dy drejtuesit e mjeteve dhe një pasagjer, ndërsa një shtetase e re ka mbetur e dëmtuar.

Grupi hetimor ndodhet në vendngjarje dhe po vijon punën për zbardhjen e plotë të shkaqeve dhe rrethanave të këtij aksidenti të rëndë, që ka tronditur opinionin publik në ditën e parë të vitit 2026.

Njoftimi i Policisë Gjirokastër:

“Rreth orës 03:18, në aksin rrugor “Gjirokastër-Tepelenë”, në vendin e quajtur “Bypass”, automjeti me drejtues shtetasin M. D., 25 vjeç, banues në Tepelenë është përplasur me automjetin që drejtohej nga shtetasi K. M., 24 vjeç, banues në Tepelenë.

Si pasojë e aksidentit, kanë humbur jetën dy drejtuesit e automjeteve, pasagjeri shtetasi A. R., 27 vjeç, banues në Tepelenë, si dhe ka mbetur e dëmtuar shtetasja A. D., 19 vjeçe, banuese në Delvinë, e cila ndodhet në spitalin e Traumës, në kujdesin e mjekëve.

Grupi hetimor vijon punën për sqarimin e plotë të rrethanave të aksidentit”.