Mbështetësit e Vetëvendosjes festojnë para selisë në Prishtinë

Simpatizantë të shumtë janë mbledhur mbrëmjen e sotme para selisë së Lëvizjes Vetëvendosje në Prishtinë, ku po festojnë rezultatet paraprake të zgjedhjeve parlamentare.

Atmosfera është shoqëruar me këngë, valle dhe fishekzjarre, ndërsa mbështetësit shprehin entuziazmin për fitoren e shpallur nga rezultatet e deritanishme.

Sipas të dhënave të publikuara nga Komisioni Qendror i Zgjedhjeve, me rreth 81% të votave të numëruara, Lëvizja Vetëvendosje e udhëhequr nga Albin Kurti ka siguruar gati 50% të votave në nivel vendi.

KQZ pritet të vijojë përditësimin e rezultateve deri në përmbylljen e plotë të procesit të numërimit.

KQZ vijon numërimin: Vetëvendosje kryeson, pjesëmarrja afro 45%

Komisioni Qendror i Zgjedhjeve po vazhdon procesimin e rezultateve nga zgjedhjet e parakohshme parlamentare të mbajtura sot në Kosovë.

Sipas të dhënave të përditësuara në platformën zyrtare të KQZ-së, deri tani janë procesuar 94,64% e kutive të votimit. Lëvizja Vetëvendosje kryeson me 49,88% të votave, e ndjekur nga Partia Demokratike e Kosovës (PDK) me 21,14%. Lidhja Demokratike e Kosovës (LDK) renditet e treta me 13,79%, ndërsa Aleanca për Ardhmërinë e Kosovës (AAK) ka marrë 5,78% të votave.

Pjesëmarrja në zgjedhje, sipas përditësimit të fundit nga KQZ, ka arritur në 44,99% të qytetarëve me të drejtë vote.

Procesi zgjedhor është zhvilluar në gjithsej 948 qendra votimi, me 2.614 vendvotime. Prej tyre, 910 qendra me 2.557 vendvotime janë përdorur për votimin e rregullt, ndërsa 38 qendra me 57 vendvotime kanë shërbyer për votimin me kusht.

Në garë për një vend në Kuvendin e Kosovës kanë qenë gjithsej 1.146 kandidatë për deputetë, të përfaqësuar nga 23 subjekte politike që morën pjesë në këto zgjedhje.

KQZ pritet të vijojë përditësimin e rezultateve deri në përmbylljen e plotë të procesit të numërimit dhe certifikimin zyrtar të zgjedhjeve.