Me dimrin që ka nisur, virozat sezonale po përhapen me shpejtësi dhe shumë njerëz janë të shqetësuar për shëndetin e tyre.

Shpesh, simptomat e Covid-19 ngatërrohen me ato të gripit, gjë që mund të çojë në diagnozë të gabuar ose në dyshime për efektivitetin e vaksinave të kryera vitet e kaluara.

Edhe pse mbi 7.1 milionë persona kanë humbur jetën globalisht nga Covid-19 – rreth 227 mijë vetëm në Britani – një studim i publikuar në JAMA Network Open arriti në përfundimin se të rriturit e vaksinuar në Francë kishin 25% më pak rrezik vdekjeje nga çdo shkak, krahasuar me të pavaksinuarit.

Studimi u bazua në të dhëna nga 22.7 milionë persona të vaksinuar dhe 5.9 milionë të pavaksinuar. Megjithatë, vaksinimi nuk do të thotë se dikush nuk mund të infektohet me Covid.

Javët e fundit, shumë punonjës mungojnë në punë për shkak sëmundjeje, pasi virozat sezonale po shfaqen më herët se zakonisht. Në shumë raste bëhet fjalë për sëmundje të ndryshme, çka e bën edhe më të lehtë konfuzionin mes gripit dhe Covid-it.

Me afrimin e festave, rritet edhe frika e infektimit me Covid, pasi kjo mund të çojë në izolim dhe shmangie të kontakteve me të afërmit, sidomos me të moshuarit.

Simptomat e gripit

Gripi (influenza) është një infeksion viral që prek hundën, fytin dhe mushkëritë, sipas Agjencisë Britanike të Sigurisë Shëndetësore.

Ai është më i rëndë se ftohja e zakonshme dhe mund të shkaktojë sëmundje serioze, veçanërisht te fëmijët, të moshuarit dhe personat me sëmundje kronike. Dimrin e kaluar, në Britani u regjistruan rreth 8.000 vdekje të lidhura me gripin.

Simptomat kryesore të gripit janë:

rrjedhje hundësh

teshtitje

lotim i syve

irritim i fytit

shfaqje e menjëhershme e simptomave

lodhje e theksuar

temperaturë e lartë

dhimbje trupi dhe muskujsh

Simptomat e Covid-19

Gjashtë vite pas rastit të parë në Uhan të Kinës, Covid-19 vazhdon të qarkullojë, por në forma më të lehta, kryesisht falë vaksinimit masiv.

Sipas Organizatës Botërore të Shëndetësisë, rreth 67% e popullsisë botërore është vaksinuar.

Sipas specialistëve, një nga dallimet kryesore është kolla, e cila në Covid është më e thatë dhe më e vazhdueshme. Shërbimi Shëndetësor Britanik (NHS) e përshkruan kollën karakteristike të Covid-it si më shumë se tre episode brenda 24 orëve.

Përveç simptomave të ngjashme me gripin, te Covid-19 mund të shfaqen edhe:

diarre ose probleme gastrointestinale

humbje e shijes ose e nuhatjes

Këto dy simptoma janë ato që e dallojnë më qartë Covid-in nga gripi. Kur ato shfaqen së bashku me simptoma gripale, rekomandohet shmangia e kontakteve me të tjerët.

Mjekja e përgjithshme dhe drejtoresha mjekësore e Midland Health, Dr. Rupa Parmar, thekson se lloji i kollës është elementi më i lehtë për t’u dalluar.

Sipas saj, te gripi kolla shfaqet papritur, ndërsa te Covid është e thatë dhe e vazhdueshme, me shumë pacientë që kolliten për më shumë se një orë ose kanë tre apo më shumë episode brenda së njëjtës ditë.