KAVAJË – Detaje të reja janë zbardhur lidhur me plagosjen e ndodhur paraditen e sotme në qytetin e Kavajës. Burime policore bëjnë me dije se autori i dyshuar i sulmit është ndaluar, ndërsa dyshohet se ai vuan nga probleme të shëndetit mendor.

Ngjarja ka ndodhur brenda një prej bizneseve në pronësi të Artur Ligejas, i cili mbeti i plagosur si pasojë e sulmit me mjet prerës. Sipas burimeve, autori ka refuzuar të largohet nga ambientet e biznesit, duke bërë të nevojshme ndërhyrjen e forcave të policisë.

I plagosuri është transportuar për ndihmë mjekësore dhe raportohet se ndodhet jashtë rrezikut për jetën.

Çfarë tha policia

Rreth orës 10:00, në qytetin e Kavajës, në vendin e quajtur “Agjensia”, në ambientet e një biznesi privat, dyshohet se gjatë një konflikti për motive të dobëta, shtetasi E. V., 42 vjeç, ka goditur me mjet prerës në dorë shtetasin A. L., 52 vjeç, i cili ka pësuar një dëmtim të lehtë.

Më pas, autori ka dëmtuar xhamat e biznesit në pronësi të shtetasit A. L., si dhe xhamat e një biznesi tjetër aty pranë.

Nga veprimet e para hetimore dyshohet se autori është përdorues i lëndëve narkotike dhe ka probleme të shëndetit mendor.

Ai është shoqëruar në ambientet e Komisariatit për veprime të mëtejshme procedurale.

Materialet procedurale iu referuan Prokurorisë së Durrësit për veprime të mëtejshme.