Tiranë, 24 dhjetor 2025 – Është mbyllur java e 18-të dhe e fundit për këtë vit në kampionatin “Abissnet Superiore”, e cila solli rezultate të rëndësishme dhe ndryshime në renditje.

Vllaznia u rikthye te fitorja në kampionat, duke mposhtur Flamurtarin me rezultatin 3-2 në stadiumin “Loro Boriçi”. Në “Elbasan Arena”, sfida mes AF Elbasanit dhe Tiranës u mbyll në barazim 1-1, një ndeshje e shoqëruar me tension dhe polemika. Ndërkohë, Vora regjistroi një fitore të thellë 4-1 ndaj Bylisit në stadiumin “Selman Stërmasi”.

Dinamo City triumfoi në transfertë ndaj Partizanit me shifrat 3-1, ndërsa Egnatia arriti një tjetër fitore jashtë fushe, duke mposhtur Teutën me rezultatin minimal 1-0. Për kampionët në fuqi, kjo ishte fitorja e katërt radhazi, që i lejon të mbyllin fazën e dytë të kampionatit në krye të renditjes me 37 pikë.

Pas përfundimit të javës së 18-të, AF Elbasani renditet në vendin e dytë me 33 pikë, Dinamo City mban vendin e tretë me 32 pikë, ndërsa Vllaznia pozicionohet e katërta me 30 pikë, duke mbajtur hapur garën për pjesën e sipërme të tabelës.