Deputetja e Tiranës për Partinë Socialiste, Olta Xhaçka, është paraqitur këtë të martë në ambientet e Prokurorisë së Posaçme kundër Korrupsionit dhe Krimit të Organizuar (SPAK).

Sipas informacioneve të deritanishme, Xhaçka ka mbërritur në SPAK pak më parë, e vetme dhe pa shoqërimin e një përfaqësuesi ligjor. Deri më tani, nuk ka të dhëna zyrtare mbi arsyen e paraqitjes së saj.

Gjatë karrierës së saj politike, Olta Xhaçka ka mbajtur poste të rëndësishme në qeveritë e drejtuara nga kryeministri Edi Rama, fillimisht si ministre e Mbrojtjes dhe më pas si ministre për Evropën dhe Punët e Jashtme.

Burime pranë SPAK bëjnë me dije se kjo nuk është hera e parë që deputetja paraqitet në ambientet e këtij institucioni, megjithatë edhe në këtë rast nuk janë bërë publike detaje shtesë mbi natyrën e thirrjes.

Më shumë informacion pritet të bëhet i ditur në orët në vijim.