Vlorë, 22 Dhjetor 2025 – Katër persona akuzohenbse sulmuan drejtorin e Inspektoratit të Mbrojtjes së Territorit, një inspektor dhe efektivë të Policisë gjatë një aksioni për lirimin e hapësirave publike në hyrje të qytetit të Vlorës.

Incidenti ndodhi kur efektivët ndërhynë për të shuar një sherr. Gjatë ndërhyrjes, një polic u godit me grushte, duke nxjerrë armën e shërbimit dhe duke qëlluar në ajër për të shpërndarë personat.

Forcat speciale “Shqiponja” më pas shoqëruan autorët e ngjarjes.

Çfarë thotë Policisë për ngjarjen

Sot, rreth orës 12:20, shërbimet e Policisë janë njoftuar se në vendin e quajtur Rrethrrotullimi i Nartës ka ndodhur një konflikt ndërmjet punonjësve të INUV dhe shtetasve I. D., 58 vjeç, D. D., 27 vjeç dhe F. D., 23 vjeç.

Në afërsi të konfliktit kanë qenë duke kryer shërbim të planizuar dy punonjës të Qarkullimit Rrugor, të cilët kanë ndërhyrë për të parandaluar përshkallëzimin e konfliktit dhe janë goditur fizikisht nga tre shtetasit e sipërpërmendur.

Gjatë ndërhyrjes dhe në përpjekje për të ndalur sulmin fizik, njëri prej punonjësve ka përdorur armën e shërbimit duke qëlluar në ajër, pa shkaktuar lëndime.

Si pasojë e dëmtimeve fizike të shkaktuara nga goditjet e tre shtetasve, dy punonjësit e Policisë janë dërguar në Spitalin Rajonal Vlorë, ku ndodhen jashtë rrezikut për jetën.

Në vendngjarje është ngritur grupi hetimor, i përbërë nga OPGJ i Prokurorisë dhe AMP, të cilët po vijojnë veprimet për sqarimin e plotë të rrethanave të ngjarjes.