Tiranë, 22 Dhjetor 2025

Klodian Braho ka marrë zyrtarisht sot detyrën si kryetar i Prokurorisë së Posaçme, gjatë një ceremonie të zhvilluar në Këshillin e Lartë të Prokurorisë.

Në fjalën e tij, Braho falënderoi KLP-në për besimin e dhënë dhe theksoi se kjo detyrë përfaqëson një angazhim për respektimin e Kushtetutës, ligjit dhe mbrojtjen e pavarësisë së SPAK-ut, si dhe për forcimin e besimit të qytetarëve te drejtësia.

Ai vlerësoi paraardhësit e tij, Arben Kraja dhe Altin Dumani, për kontributin në ndërtimin dhe forcimin e institucionit, duke theksuar rolin e tyre në konsolidimin e SPAK-ut dhe rritjen e besimit publik.

Braho deklaroi se fokusi i punës së tij do të jetë forcimi i funksionimit të brendshëm, respektimi rigoroz i standardeve ligjore dhe garantimi i pavarësisë së prokurorëve të posaçëm. Ai theksoi rëndësinë e bashkëpunimit me Byronë Kombëtare të Hetimit dhe sektorin e hetimit financiar, si shtylla kyçe të veprimtarisë së SPAK-ut.

Në përfundim, Braho nënvizoi se misioni i Prokurorisë së Posaçme shkon përtej mandateve individuale dhe kërkon angazhim të përbashkët në shërbim të ligjit dhe qytetarëve shqiptarë.