Në Prokurorinë e Posaçme kundër Korrupsionit dhe Krimit të Organizuar (SPAK) mbahet sot ceremonia zyrtare e kalimit të detyrës nga Altin Dumani te drejtuesi i ri, Klodian Braho, i zgjedhur për një mandat trevjeçar me 7 vota të anëtarëve të Këshillit të Lartë të Prokurorisë (KLP).

Ceremonia është parashikuar të zhvillohet në orën 10:00 dhe vlerësohet nga SPAK si një moment i rëndësishëm për garantimin e vazhdimësisë institucionale dhe forcimin e mëtejshëm të luftës kundër korrupsionit dhe krimit të organizuar.

Mandati i drejtuesit të SPAK është tre vjet, pa të drejtë rizgjedhjeje. Altin Dumani, i cili pasoi Arben Krajën si drejtues i Strukturës së Posaçme, do të vijojë detyrën si prokuror i SPAK deri në vitin 2028, kur i përfundon mandati i tij 9-vjeçar.

Dumani e mbylli mandatin në krye të SPAK pasi dështoi me kërkesat e vazhdueshme për mundësinë e rikandidimit në post dhe për zgjatjen e mandatit 9 vjeçar të prokurorëve të SPAK.

Klodian Braho është një prej prokurorëve me karrierë të gjatë në sistemin e drejtësisë. I emëruar prokuror në vitin 2007, ai ka shërbyer në Prokurorinë e Beratit dhe më pas në atë të Vlorës, ku ka mbajtur edhe detyrën e zëvendësdrejtuesit. Në Vlorë u bë i njohur për hetimin dhe dërgimin në gjyq të ish-kryebashkiakut Shpëtim Gjika.

Në vitin 2015, Braho u emërua në Prokurorinë e Krimeve të Rënda, ku spikati me hetimin ndaj ish-Prokurorit të Përgjithshëm Adriatik Llalla, një nga çështjet simbol të llogaridhënies në nivelet e larta të drejtësisë.

Si prokuror i SPAK, Klodian Braho ka drejtuar disa nga dosjet me ndikim të gjerë publik, përfshirë çështjen e inceneratorit të Elbasanit, dosjen “5D”, hetimin “Toyota Auris”, si dhe ka qenë pjesë e grupit të prokurorëve që firmosën dosjen ndaj ish-ministrit të Mbrojtjes Fatmir Mediu për çështjen e Gërdecit.