Policia e Tiranës tha sot se ka finalizuar operacionin policor të koduar “Night”, të drejtuar nga Seksioni për Hetimin e Narkotikëve.

Si rezultat i informacioneve të siguruara në rrugë operative dhe ndërhyrjes së shpejtë, shërbimet e Policisë kanë arrestuar në flagrancë një 19-vjeçar, banues në Tiranë, i dyshuar për shpërndarje të lëndës së ndaluar në doza, kryesisht në lokale nate dhe zona me frekuentim të lartë në kryeqytet.

Operacioni u zhvillua në zona të ndryshme të Tiranës, përfshirë rrugët “Papa Gjon Pali II” dhe “Mustafa Matohiti”, ku i riu dyshohet se siguronte lëndën, e ndante në doza dhe e shiste në ambiente argëtimi.

Gjatë kontrollit fizik, Policia i gjeti dhe i sekuestroi 19-vjeçarit, me cilësinë e provës materiale, një sasi lënde të dyshuar narkotike kokainë, e ndarë në doza dhe e gatshme për shpërndarje.

Materialet procedurale i janë referuar Prokurorisë së Tiranës, e cila po ndjek çështjen për veprime të mëtejshme ligjore. /noa.al