Seanca e fundit parlamentare e Kuvendit të Shqipërisë për vitin 2025 është mbyllur mes tensionesh të forta, flakadanësh, përplasjeve fizike dhe akuzave politike, duke e bërë të pamundur zhvillimin normal të punimeve.

Salla e Kuvendit u mbush me tym për shkak të flakadanëve të ndezur, ndërsa situata u përshkallëzua me përplasje mes deputetëve të opozitës dhe punonjësve të Gardës, të cilët tentonin të rikthenin rendin në sallë. Përplasjet dhe zhurmat penguan vazhdimisht vijimin e seancës.

Mes këtij kaosi u zhvillua edhe betimi i Avokatit të Popullit, Endri Shabani. Me propozim të kreut të grupit parlamentar të Partisë Socialiste, Taulant Balla, Kuvendi kaloi fillimisht në votimin e prezencës dhe më pas në votimin e disa projektligjeve, me qëllim mbylljen formale të seancës.

Gjatë gjithë kohës, kreu i Partisë Demokratike, Sali Berisha, qëndroi në këmbë në sallë, duke transmetuar zhvillimet drejtpërdrejt në profilin e tij në rrjetet sociale. Ai bllokoi foltoren dhe refuzoi të largohej, ndërsa deputetë të PD-së zunë vendet e ministrave, duke mos u ulur në vendet e tyre.

View this post on Instagram

A post shared by Agjencia Kombëtare e Lajmeve NOA (@noanews)

Në këtë situatë, Kryetarja e Kuvendit përjashtoi nga seanca dy deputetë të PD-së, Klevis Balliu dhe Flamur Noka, të cilët sipas saj hodhën sende në drejtim të ministrave dhe punonjësve të Gardës.

Deputetë të opozitës u përplasën fizikisht edhe me Gardën, duke kërkuar largimin e tyre nga salla. Po ashtu, u hodhën ujë dhe letra në drejtim të ministrit Niko Peleshi dhe punonjësve të sigurisë.

Përballë këtij kaosi, Niko Peleshi kaloi drejtpërdrejt në votim, dhe mes zhurmës e tensioneve u miratua rendi i ditës, si edhe disa prej projektligjeve që ishin në agjendë.

E gjithë seanca zgjati më pak se një orë, por u shoqërua nga një klimë e rëndë tensioni politik, duke shënuar një mbyllje të trazuar të sesionit parlamentar për këtë vit. /noa.al