Si pronarë kafshësh shtëpiake, me siguri na ka ndodhur të buzëqeshim (ose edhe të qeshim) me tingujt ritmikë që nxjerr qeni ynë gjatë gjumit. Po flasim, sigurisht, për gërhitjen.

Gërhitja te qentë është një dukuri e zakonshme, por në disa raste mund të jetë edhe shenjë që kërkon vëmendje. Të kuptuarit e arsyeve pse qeni juaj gërhet ju ndihmon të vendosni nëse është thjesht diçka normale apo nëse duhet të konsultoheni me veterinerin.

Çfarë ndodh kur qeni gërhet

Gërhitja funksionon njësoj si te njerëzit. Ajo ndodh kur rrjedha e ajrit që kalon nga hunda dhe rrugët e sipërme të frymëmarrjes pengohet pjesërisht. Si pasojë, indet në këtë zonë fillojnë të dridhen dhe krijojnë zhurmën karakteristike të gërhitjes.

Sa më e kufizuar të jetë rrjedha e ajrit, aq më e fortë është gërhitja. Zakonisht dëgjohet më shumë gjatë thithjes së ajrit dhe më pak gjatë nxjerrjes.

9 arsyet kryesore pse qeni juaj gërhet

1. Infeksione të rrugëve të sipërme të frymëmarrjes

Ashtu si njerëzit gërhasin më shumë kur janë të ftohur, edhe qentë mund të zhvillojnë bllokim të hundës për shkak të një infeksioni apo viroze, gjë që vështirëson frymëmarrjen dhe shkakton gërhitje.

—

2. Mbipesha

Shtimi në peshë nuk ndodh vetëm në trup, por edhe në zonën e qafës. Indet shtesë në këtë zonë mund të ngushtojnë rrugët e ajrit dhe të shkaktojnë gërhitje gjatë gjumit.

—

3. Alergjitë

Alergjitë mund të irritojnë rrugët e frymëmarrjes dhe të shkaktojnë ënjtje të indeve të hundës, duke kufizuar kalimin e ajrit. Pluhuri, poleni, myku apo substanca të tjera janë shpesh shkaktarë.

4. Pozicioni i gjumit

Nëse qeni gërhet vetëm kur fle shtrirë përmbys ose me barkun lart, arsyeja mund të jetë pozicioni. Në këtë rast, gjuha mund të bjerë pas në fyt dhe të pengojë frymëmarrjen.

5. Absces ose problem dentar

Infeksionet bakteriale në dhëmbë mund të shkaktojnë inflamacion të indeve përreth, duke ndikuar në rrugët e frymëmarrjes dhe duke çuar në gërhitje.

6. Hipotiroidizmi

Gërhitja mund të jetë një nga shenjat e mungesës së hormoneve tiroide. Shenja të tjera përfshijnë lodhje, shtim në peshë, rënie të energjisë, qime pa shkëlqim, ndjeshmëri ndaj të ftohtit dhe infeksione të shpeshta të lëkurës ose veshëve.

7. Karakteristikat e racës

Disa raca kanë më shumë gjasa të gërhasin për shkak të ndërtimit anatomik. Racat me feçkë të shkurtër (brakicefalike) si Bulldogët, Boxerët, Pugët, Boston Terrier dhe Shih Tzu kanë rrugë ajri më të ngushta, çka e bën gërhitjen më të zakonshme.

8. Mosha

Me kalimin e viteve, qentë mund të përjetojnë ndryshime në cilësinë e gjumit. Artriti, dobësia muskulore dhe vështirësia për të gjetur pozicione të rehatshme mund të rrisin gërhitjen. Qentë e moshuar mund të zgjohen më shpesh ose të kenë cikle gjumi më të parregullta.

Një shtrat më mbështetës dhe kontrolle të rregullta veterinare ndihmojnë ndjeshëm në këtë fazë të jetës.

9. Pengesa në rrugët e ajrit

Çdo objekt i huaj që bllokon hundën ose rrugët e frymëmarrjes, si një copë e vogël apo mbetje, mund të shkaktojë gërhitje të papritur.

Çfarë mund të bëni për të reduktuar gërhitjen

Në disa raste, zgjidhja është e thjeshtë: ndihmojeni qenin të ndryshojë pozicion gjumi ose të humbasë pak peshë nëse është mbipeshë. Nëse shkaku është një infeksion i lehtë, gërhitja zakonisht zhduket sapo qeni të shërohet.

Në rast se gërhitja shfaqet papritur ose pa arsye të dukshme, veterineri mund të ndihmojë për të identifikuar shkakun.

Kur bëhet fjalë për alergjitë, disa ndryshime në mjedis janë shumë të dobishme:

fshirja e qenit me një leckë të lagur pas shëtitjeve

pastrimi i shpeshtë i dyshemeve dhe shtratit të tij

përdorimi i filtrave të ajrit dhe kondicionerëve

përdorimi i një lagështuesi për të mbajtur rrugët e frymëmarrjes të hidratuara

Te qentë me feçkë të shkurtër, gërhitja nuk është gjithmonë shenjë problemi, por është e rëndësishme të kontrollohet pesha dhe frymëmarrja, sidomos gjatë sëmundjeve. Në raste të veçanta, veterineri mund të rekomandojë edhe ndërhyrje kirurgjikale për të përmirësuar kalimin e ajrit.

***

Çdo qen është unik dhe gërhitja mund të jetë rezultat i një ose disa faktorëve njëkohësisht. Vëzhgimi i sjelljes së tij dhe kontrollet e rregullta te veterineri janë çelësi për shëndet dhe gjumë të qetë.

Gjumë të ëmbël për ju dhe mikun tuaj me katër putra. 🐾 /noa.al