Ilir Meta do të merret në pyetje nga SPAK për ngjarjet e 21 janarit 2011

Ilir Meta, kryetar i partisë së Lirisë, ish Lëvizje Socialiste për Integrim (LSI), këtë të enjte do të shkojë në SPAK për të dëshmuar mbi 21 janarin 2011.

Bëhet fjalë për demonstratën e thirrur nga Edi Rama atëherë në opozitë si kryetar i PS, protestë që u bë kundër Ilir Metës dhe precipitoi në dhunë të gjerë nga një pjesë e protestuesve dhe qitje me armë zjarri nga Garda duke i marrë jetën 4 personave të pranishëm.

Z.Meta njoftoi sot se, do të paraqitet ditën e nesërme në Prokurorinë e Posaçme kundër Korrupsionit dhe Krimit të Organizuar (SPAK), ku do të merret në pyetje në orën 10:00, në lidhje me ngjarjet e 21 janarit 2011.

Ka qenë vetë Meta ai që, disa javë më parë, ka kërkuar të dëshmojë për këtë çështje, duke shprehur gatishmërinë për t’u pyetur nga organet e drejtësisë.

Prej më shumë se një viti, ish-Presidenti i Republikës ndodhet në paraburgim, ndërsa po përballet me disa akuza të ngritura nga SPAK, në kuadër të hetimeve të ndryshme penale.

Më herët, për ngjarjet e dhunshme gjatë demonstratës së 21 janarit 2011, SPAK ka marrë në pyetje edhe figura të tjera të njohura politike, mes tyre ish-kryeministrin Sali Berisha, ish-kryetarin e Bashkisë së Tiranës Lulzim Basha, si dhe ish-Presidentin Bamir Topi.

Hetimet për këtë çështje vijojnë. /noa.al