Një djalë i mitur është plagosur paraditen e sotme në shkollën private "Dea" në Sarandë pasi u përfshi në një konflikt me armë të ftohta me një moshatarin e tij.

Policia bën me dije se sot, rreth orës 10:00, në ambientet e një shkolle jopublike 9-vjeçare në lagjen nr. 3 të Sarandës, ka ndodhur një konflikt mes dy të miturve.

Sipas njoftimit zyrtar, gjatë një përplasjeje për motive të dobëta, dyshohet se një nxënës 13-vjeçar ka dëmtuar me mjet prerës një tjetër të mitur, 15 vjeç.

I dëmtuari është transportuar menjëherë në spital, ku ndodhet nën kujdesin e mjekëve dhe jashtë rrezikut për jetën.

Policia po vijon veprimet për shoqërimin e autorit të dyshuar, si dhe për sqarimin dhe dokumentimin e plotë të rrethanave të kësaj ngjarjeje. /noa.al