Kompania ajrore Air Albania po prek fundin, pasi Autoriteti i Aviacionit Civil ka vendosur pezullimin e lejes së funksionimit të saj.

Vendimi lidhet me probleme serioze në përmbushjen e kushteve ligjore dhe rregullatore që kërkohen për operimin e fluturimeve. Në faqen zyrtare të AAC nuk gjendet një njoftim publik e po ashtu as në faqen e Air Albania ose mediat e saj sociale, raporton noa.al.

Sipas mediave greke që publikuan sot lajmin, ky zhvillim vjen pas disa ditësh raportimesh për vështirësi financiare dhe paqartësi në aktivitetin e kompanisë.

Gjatë kësaj periudhe janë shënuar edhe anulime fluturimesh në disa linja të rëndësishme, përfshirë destinacione ndërkombëtare, pa shpjegime të detajuara zyrtare.

Air Albania, e krijuar në vitin 2018, ka pasur si partner strategjik Turkish Airlines, por së fundmi është bërë e ditur se pala turke ka vendosur të tërhiqet nga aksionet e saj në kompani, duke shitur 49 për qind të pjesëmarrjes. Ky largim ka shtuar më tej pasiguritë për të ardhmen e linjës ajrore.

Megjithëse më herët ishte folur për plane zgjerimi dhe forcim të aktivitetit, pezullimi i lejes së operimit e vendos kompaninë përballë një periudhe vendimtare. /noa.al