Vatikan – 13 dhjetor 2025

Presidentja e Republikës së Kosovës, Vjosa Osmani, është pritur sot në Selinë e Shenjtë, në një audiencë zyrtare nga Papa Leo XIV në Pallatin Apostolik në Vatikan, ku ka kërkuar njohjen formale të Kosovës nga Vatikani.

Përmes një videomesazhi, Osmani e cilësoi takimin si një ditë shumë të rëndësishme për marrëdhëniet ndërmjet Republikës së Kosovës dhe Vatikanit, duke shprehur shpresën që Selia e Shenjtë të marrë vendimin e shumëpritur për njohjen e shtetit të Kosovës.

Ajo theksoi se një hap i tillë do të kontribuonte në paqen dhe stabilitetin jo vetëm në rajon, por edhe në kontinentin evropian.

“Paraqita shpresën dhe besimin e gjithë popullit të Kosovës që Vatikani më në fund të marrë vendimin për njohjen e Republikës së Kosovës, duke njohur vuajtjet e gjata të popullit tonë për të jetuar i lirë, i pavarur dhe në demokraci”, deklaroi Osmani.

Presidentja nënvizoi se njohja nga Vatikani do të kishte ndikim të drejtpërdrejtë në mirëqenien dhe suksesin e Kosovës, si dhe në forcimin e stabilitetit rajonal dhe evropian. Ajo vuri në dukje edhe kontributin historik të Kosovës në qytetërimin evropian, duke përmendur figura si Gjergj Kastrioti Skënderbeu dhe Shën Tereza, si dhe rolin e Dardanisë në historinë e krishterimit dhe humanizmit.

Gjatë vizitës, Osmani përcolli edhe urimet e popullit të Kosovës për Krishtlindje dhe Vitin e Ri, ndërsa ftoi Papa Leon XIV që të vizitojë Republikën e Kosovës.

“E ftova Shenjtërinë e Tij që të vizitojë Kosovën, me shpresën që një vizitë e tillë të realizohet sa më parë”, u shpreh presidentja nga sheshi kryesor i Vatikanit.