TIRANË, 11 dhjetor 2025 Paratë që emigrantët shqiptarë dërgojnë drejt familjeve në atdhe kanë arritur nivele rekord, duke vijuar prirjen e fortë rritëse të viteve të fundit. Sipas të dhënave zyrtare të Bankës së Shqipërisë, remitancat në periudhën janar-shtator 2025 arritën në 817 milionë euro, një rritje prej 5.9% krahasuar me të njëjtën periudhë të vitit të kaluar.

Rritja u përshpejtua veçanërisht gjatë tremujorit të tretë, që tradicionalisht shënon flukse më të larta për shkak të ardhjes së emigrantëve në Shqipëri gjatë sezonit veror. Vetëm në korrik-shtator, prurjet arritën në 285 milionë euro, me një rritje prej 8.8% nga një vit më parë.

Tendenca rritëse e remitancave ka qenë e qëndrueshme që prej vitit 2013, duke reflektuar ciklin e ri emigrator që nisi sidomos pas vitit 2015. Pas ngadalësimit të përkohshëm nga pandemia në vitin 2020, prurjet u ringritën me ritme të shpejta, duke kapur për herë të parë pragun e 800 milionë eurove në 9 muajt e parë të vitit 2024. Me ecurinë aktuale, ekspertët vlerësojnë se viti 2025 mund të mbyllet me mbi 1 miliard euro remitanca.

Eurostat vlerëson se vetëm gjatë viteve 2022-2023 rreth 154 mijë shtetas shqiptarë morën leje qëndrimi për herë të parë në vendet e BE-së, ndërsa që nga viti 2008 numri arrin në rreth 920 mijë. Kjo bazë e gjerë e emigrantëve të rinj ka krijuar një potencial të madh për rritjen e transfertave drejt familjeve në Shqipëri.

Sipas aktorëve të tregut, kanalet tradicionale të remitancave mbeten Greqia dhe Italia, ndërsa vitet e fundit vihet re rritje e dukshme nga destinacionet e reja si Mbretëria e Bashkuar dhe Gjermania. Remitancat raportohen nga Banka e Shqipërisë si pjesë e llogarisë korrente në bilancin e pagesave, duke përfshirë prurjet formale përmes bankave dhe operatorëve financiarë, si dhe vlerësimet e prurjeve informale bazuar në anketa dhe të dhëna të agreguara të tregut.