Tiranë- Kryeministri Edi Rama ka reaguar ashpër ndaj deklaratës së Shoqatës së Gjyqtarëve, e cila akuzoi kreun e qeverisë se po ushtron “presion” ndaj Gjykatës Kushtetuese lidhur me çështjen “Balluku”.

Në një postim në rrjetin X, Rama u shpreh se Shoqata e Gjyqtarëve ose “nuk e di kuptimin e fjalës presion”, ose zgjedh të mos flasë kur presionet sipas tij kryhen nga aktorë të tjerë.

Rama: Nuk jam përfshirë në luftë me gjyqtarët — kam mbështetur Reformën në Drejtësi

Kreu i qeverisë theksoi se prej një dekade ka mbështetur reformimin e sistemit, ndërsa u shpreh se shpesh ka “përtypur në heshtje” gabime të gjyqësorit, që sipas tij kanë cenuar liritë e qytetarëve dhe interesat e shtetit.

Rama shtoi se Shoqata e Gjyqtarëve “gabon rëndë” nëse pret që ai të mos shprehë publikisht mendimin e tij, madje edhe kur ai vetë është palë në një proces kushtetues. Kryeministri kundër kërkesës për rritje pagash me vendim gjykate

Në reagimin e tij, Rama kritikon sërish kërkesën e Shoqatës së Gjyqtarëve për rritje pagash përmes Gjykatës Kushtetuese, duke e cilësuar një lëvizje që “anashkalon qeverinë dhe parlamentin”.

Sipas tij, kërkesa e fundit synon një rritje prej 1600 eurosh mbi pagën aktuale të magjistratëve dhe këshilltarëve.

Rama: Institucionet janë të hapura për dialog

Pavarësisht kritikave, kryeministri deklaroi se qeveria dhe shumica parlamentare mbeten të gatshme për komunikim institucional me Shoqatën e Gjyqtarëve, me qëllim adresimin e sfidave të drejtësisë së re.

Ai shtoi se pavarësia e gjyqësorit duhet mbrojtur jo vetëm nga ndërhyrjet e jashtme, por edhe nga “papërgjegjshmëria e brendshme” që sipas tij dëmton besimin e publikut.