Një aksident rrugor është regjistruar mesditën e sotme në kthesën e Çakranit, ku një furgon i Forcave të Ndërhyrjes së Shpejtë (FNSH) është përplasur me një automjet tip “Benz”, duke përfunduar më pas në një kanal anësor.

Si pasojë e përplasjes janë lënduar dy efektivë policie, të cilët u transportuan menjëherë në spital për të marrë trajtim mjekësor. Në vendngjarje kanë mbërritur tre autoambulanca, ndërsa forcat e policisë vijojnë punën për sqarimin e plotë të rrethanave të aksidentit.

Sipas të dhënave paraprake, ende nuk dihen shkaqet e sakta që çuan në ngjarje, ndërsa grupi hetimor po kryen veprimet procedurale dhe po mbledh provat që do ndihmojnë në përcaktimin e dinamikës së përplasjes.

Autoritetet u bëjnë apel drejtuesve të mjeteve të respektojnë rregullat e qarkullimit, veçanërisht në segmentet e njohura për rritje të riskut të aksidenteve.