Tiranë, 3 dhjetor 2025

Policia Rrugore ka bërë thirrje për kujdes të shtuar nga drejtuesit e automjeteve, pasi vendi po përfshihet nga ulja e temperaturave dhe priten reshje dëbore e ngrica, kryesisht në zonat malore. Autoritetet njoftojnë se prezenca e lagështirës dhe formimi i akullit në disa akse rrugore mund të rrisin rrezikun e aksidenteve.

Sipas njoftimit zyrtar, Policia Rrugore ka shtuar patrullimet në të gjitha akset me qëllim parandalimin e ngjarjeve rrugore, lehtësimin e qarkullimit dhe asistimin e drejtuesve të mjeteve në raste nevoje.

Drejtuesit e automjeteve këshillohen të respektojnë sinjalistikën, të përdorin goma dimërore dhe zinxhirë aty ku kërkohet, të ndjekin udhëzimet e punonjësve të policisë, të ulin shpejtësinë dhe të mbajnë distancë të sigurt me mjetet e tjera. Gjithashtu, policia apelon të shmangen parakalimet e rrezikshme dhe përdorimi i celularit gjatë drejtimit të mjetit, ndërsa kërkohet vendosja e rripit dhe kaskës mbrojtëse.

Në rast nevoje për asistencë, qytetarët mund të telefonojnë numrin pa pagesë 112.