Itali, 28 nëntor 2025 – Një ngjarje e rëndë ka tronditur komunitetin shqiptar në Reggio Emilia, ku një 18-vjeçar me origjinë shqiptare, Francesco Ajdini, humbi jetën pas një aksidenti rrugor në zonën e Sorbolo di Parma. Ngjarja ndodhi pasditen e së enjtes, rreth orës 16:00, në Via Marconi, pranë stacionit të trenit përgjatë Rrugës Provinciale 62.

Sipas raportimeve të para, i riu po udhëtonte me motorin e tij “Scooter” kur u përplas me një automjet që po kryente një kthesë majtas. Përplasja ishte e fortë dhe i riu përfundoi në asfalt, ndonëse mbante helmetë. Ekipet e ndihmës së shpejtë mbërritën menjëherë dhe ndërhynë për t’i dhënë ndihmën e parë, ndërsa në vendngjarje u dërgua edhe helikopteri i emergjencës. Pavarësisht përpjekjeve të mjekëve, plagët e marra rezultuan fatale.

Hetimet për aksidentin po drejtohen nga karabinierët e Parmës dhe stacionit të Sorbolos, me mbështetjen e policisë lokale dhe zjarrfikësve.

Francesco Ajdini jetonte prej vitesh me familjen e tij në Praticello di Gattatico. Kryebashkiaku Daniele Finucci, i cili i njihte personalisht prindërit e tij, shprehu ngushëllime të thella, duke e përshkruar familjen Ajdini si një familje punëtore, të ndershme dhe shumë të respektuar në komunitet.

Në rrjetet sociale, miqtë e familjes dhe bashkëmoshatarët e të riut kanë shprehur trishtim dhe solidaritet, duke kujtuar Francescon si një djalë të qeshur, energjik dhe të dashur. Në profilin e babait të tij, Flamur Ajdini, ndodhen fotot e festës së 18-vjetorit të djalit, vetëm pak muaj më parë.

Pronari i kompanisë ku punon i ati, Luca Accorsi, u shpreh po ashtu i prekur: “Flamuri është një njeri shumë i mirë. Kjo humbje është e rëndë për të gjithë ne.”

Kjo tragjedi rikthen një plagë të vjetër për familjen Ajdini, pasi në vitin 2004 ata humbën edhe vajzën e tyre 2-vjeçare, Sara, gjithashtu në një aksident rrugor. Ngjarja e djeshme ka tronditur thellë komunitetin e zonës, i cili sot qëndron pranë familjes së goditur nga dhimbja.

Autoritetet italiane po vijojnë hetimet për të sqaruar rrethanat e plota të aksidentit.