Drejtori i FBI-së, Kash Patel, dhe kryetarja e Bashkisë së Uashingtonit, Muriel Bowser, deklaruan se pjesëtarët e Gardës janë shtruar në spital në gjendje kritike pas të shtënave të pasdites së së mërkurës. Guvernatori i Virxhinias Perëndimore, Patrick Morrisey, u tërhoq nga deklarata e tij e bërë të mërkurën, në të cilën njoftonte se trupat kishin ndërruar jetë, duke thënë se kishte marrë “raportime kontradiktore” për gjendjen e tyre

Uashington, 26 nëntor 2025 – Dy ushtarë të Gardës Kombëtare të SHBA-së u qëlluan në një sulm me armë zjarri pranë Shtëpisë së Bardhë, në një nga zonat më të mbrojtura të kryeqytetit amerikan. Njësitë e emergjencës dhe policia u vendosën menjëherë në terren, ndërsa autoritetet konfirmuan se një i dyshuar është arrestuar.

Drejtori i FBI-së, Kash Patel, dhe kryetarja e Bashkisë së Uashingtonit, Muriel Bowser, deklaruan se pjesëtarët e Gardës janë shtruar në spital në gjendje kritike pas të shtënave të pasdites së së mërkurës. Guvernatori i Virxhinias Perëndimore, Patrick Morrisey, u tërhoq nga deklarata e tij e bërë të mërkurën, në të cilën njoftonte se trupat kishin ndërruar jetë, duke thënë se kishte marrë “raportime kontradiktore” për gjendjen e tyre.

Policia Metropolitane e Washington D.C. njoftoi në platformën “X” se “zona është e siguruar” dhe se personi i dyshuar për të shtënat është vënë në pranga. Hetimet për identifikimin e motivit vijojnë intensivisht.

Në momentin e ngjarjes, Presidenti amerikan Donald Trump ndodhej në fushën e tij të golfit në West Palm Beach, Florida. Ai reagoi pak më vonë në rrjetin social Truth, duke e quajtur sulmin një akt të rëndë dhe duke paralajmëruar një përgjigje të fortë:

“Personi që qëlloi dy anëtarët e Gardës Kombëtare, të cilët janë në gjendje kritike, është gjithashtu rëndë i plagosur, por pavarësisht kësaj, do të paguajë një çmim shumë të lartë! Zoti bekoftë Gardën tonë Kombëtare, si dhe të gjitha Forcat e Armatosura dhe ato policore!”

**Çfarë është Garda Kombëtare?**

Garda Kombëtare është një forcë ushtarake rezervë e shpërndarë në të 50 shtetet amerikanë, si dhe në Washington D.C., Guam dhe Puerto Rico. Njësitë e saj shërbejnë si një strukturë mbështetëse në raste katastrofash natyrore, ruajtje të rendit dhe operacione sigurie, ndërsa disa trupa mund të dërgohen edhe jashtë vendit.

Edhe pse raportojnë te Departamenti i Mbrojtjes, aktivizimi i Gardës Kombëtare zakonisht bëhet nga guvernatorët e shteteve, ndërsa presidenti mund t’i federalizojë në raste të veçanta. Kompetencat e tyre janë të kufizuara dhe ata nuk kanë të njëjtat të drejta arrestimi si policia lokale.

Në muajt e fundit, Garda Kombëtare ishte vendosur në Washington D.C. si pjesë e operacionit për goditjen e kriminalitetit të shpallur nga Presidenti Trump.

Hetimet për incidentin e rëndë vazhdojnë, ndërsa autoritetet nuk kanë bërë ende publike detaje të mëtejshme mbi motivet ose të dhënat e autorit të dyshuar.