Marta Kos: “Europa nuk mund të jetë e sigurt pa Ballkanin, shtëpia juaj po ju pret”

Komisionerja e BE-së për Zgjerimin, Marta Kos, deklaroi në Tiranë më 21 nëntor 2025 se procesi i zgjerimit të Bashkimit Evropian është gjithnjë e më i lidhur me sigurinë e kontinentit dhe se Ballkani Perëndimor është pjesë thelbësore e kësaj të ardhmeje.

“Është kënaqësi për mua të jem këtu pak pasi kemi publikuar paketën e zgjerimit të BE-së. Tashmë kjo është një çështje me të cilën po punojmë intensivisht dhe ka gjithnjë e më shumë të bëjë me sigurinë. Europa nuk mund të jetë e sigurt pa Ballkanin. Ky është një gabim që kemi bërë dhe që duhet ta korrigjojmë”, u shpreh Kos.

Ajo theksoi se vendet e rajonit janë pjesë e natyrshme e Evropës dhe se anëtarësimi është kryesisht çështje formalizimi institucional. “Shtëpia juaj, Europa, po ju pret. Ju jeni pjesë e BE-së, thjesht duhet ta bëjmë këtë në formë institucionale”, tha ajo.

Duke iu referuar Planit të Rritjes për Ballkanin Perëndimor, Kos vuri në dukje se kanë kaluar dy vjet nga zbatimi i tij dhe se, ndonëse ka arsye për të festuar, ende ka sfida serioze. “Dy nga gjashtë vendet e rajonit nuk kanë nisur ende reformat. Shohim një lidhje të qartë mes procesit dhe reformave, por fondet janë disbursuar vetëm në rreth 10%. Duhet të bëjmë më shumë. Komisioni Evropian dëshiron që Plani i Rritjes të jetë i suksesshëm”, theksoi ajo.

Kos përmendi përfitimet konkrete që tashmë po ndihen në rajon, si përfshirja e Shqipërisë, Malit të Zi dhe Maqedonisë së Veriut në sistemin SEPA, duke nënvizuar se objektivi i BE-së është që të gjitha vendet të ecin përpara në sinkron. “Nuk duam që askush të mbetet pas”, tha ajo.

Komisionerja paralajmëroi gjithashtu për një afat të rëndësishëm: në qershor përfundon periudha njëvjeçare për përmbushjen e reformave të mbetura pezull, dhe në rast dështimi rrezikohen 300 milionë euro fonde. Ajo bëri thirrje për diskutime konkrete mbi uljen e tarifave të roaming-ut dhe përshpejtimin e përafrimit me rregullat e BE-së, duke theksuar se këto hapa do të sjellin përfitime të drejtpërdrejta për bizneset dhe qytetarët e rajonit.