Si u hodhën në ujë për të shpëtuar një të moshuar që përfundoi me makinë në kanal: “Ai njeri ishte drejt vdekjes"

Një incident pranë kanalit Battaglia në Padovë u kthye në një histori shpëtimi pas ndërhyrjes së dy kalimtarëve që u hodhën në ujë për të ndihmuar një të moshuar të bllokuar brenda makinës së tij.

I moshuari Giuseppe Salvalajo, sipërmarrës dhe themelues i një kompanie që operon në restaurimin e objekteve arkitekturore, sapo kishte dalë nga rezidenca e tij historike, Villa Molin, kur automjeti Toyota Yaris doli nga rruga dhe përfundoi në kanal. Për arsye ende të paqarta, ai humbi kontrollin e makinës dhe mbeti nën tronditje brenda kabinës, ndërsa automjeti po zhytjej me shpejtësi, i tërhequr nga rryma.

Dy kalimtarë u hodhën në ujë për ta shpëtuar

I moshuari, themelues i kompanisë që mban emrin e tij dhe që vepron në fushën e restaurimit të objekteve arkitekturore me vlerë, kishte rënë në ujë me automjetin e tij.

Siç tregohet edhe në video, Elton Zefi, 32 vjeç, u hodh menjëherë në ujë pasi pa makinën duke u fundosur. “Nuk mendova dy herë. Mendoja vetëm se duhej vepruar shpejt”, tha Zefi. Së bashku me një tjetër dëshmitar, ai u përpoq të thyente xhamat për ta nxjerrë të moshuarin, por tentativa e parë ishte e pamundur.

“U ngjitëm edhe në çati për të thyer xhamin e pasmë, por nuk funksionoi. Pastaj pashë nga sedilja e pasme një dorë që lëvizte. Kuptova që xhami ishte i hapur dhe ajo ishte e vetmja mundësi për ta nxjerrë jashtë”, tregon ai.

Pavarësisht të ftohtit, Zefi bëri një përpjekje të fundit dhe arriti ta tërhiqte të moshuarin jashtë automjetit. Të dy e transportuan deri në breg, ku pak çaste më vonë mbërritën ekipet e shpëtimit.