Pozallo, Itali – Një aksident tragjik në vendin e punës i ka marrë jetën 36-vjeçarit shqiptar Artur Deliu, i cili u godit nga krahu mekanik i betonierës ndërsa punonte në çatinë e një objekti në ndërtim. Ngjarja ndodhi të hënën, ndërsa një tjetër punëtor mbeti i plagosur rëndë.

Sipas autoriteteve italiane, goditja ishte fatale dhe Deliu ndërroi jetë në vendngjarje, pavarësisht ndërhyrjes së shpejtë të ekipeve të emergjencës. Ai ishte i martuar dhe baba i dy fëmijëve, ndërsa prej vitesh jetonte në Itali, fillimisht në Brescia e më pas në Siçili.

Trupi i tij pritet të transportohet drejt Shqipërisë, ku do të varroset në Tiranë, qytetin e lindjes së 36-vjeçarit.

Ndërkohë, hetimet për rrethanat e aksidentit vijojnë. Autoritetet po verifikojnë gjendjen teknike të pajisjeve në kantier, mirëmbajtjen e tyre, si dhe nëse pompa e betonit kishte kaluar kontrollet e detyrueshme të sigurisë.