Vendim i ri në KPK: Besim Kelmendi largohet nga drejtimi, Agron Qalaj emërohet ushtrues detyre

Këshilli Prokurorial i Kosovës ka marrë sot një vendim të rëndësishëm për strukturën e drejtësisë. Me pesë vota pro, anëtarët e KPK-së kanë vendosur shkarkimin e ushtruesit të detyrës së kryeprokurorit të Shtetit, Besim Kelmendi.

Nga dita e nesërme, detyrën e tij do ta marrë prokurori Agron Qalaj, i propozuar nga kryesuesi i Këshillit, Ardian Hajdari.

Ky zhvillim vjen vetëm një ditë pas konferencës së jashtëzakonshme për media të Kelmendit, në të cilën ai reagoi ndaj raportimeve që e lidhnin me gjyqtaren serbe Danica Marinkoviq në vitin 1999—gjyqtare e cila në atë kohë ka trajtuar dosjen e masakrës së Reçakut dhe e cilësoi atë si “ngjarje të sajuar”.

Kelmendi konfirmoi se të mërkurën është paraqitur si dëshmitar në Prokurorinë Speciale të Kosovës për të sqaruar rolin e tij profesional në periudhën kur ka ndodhur Reçaku.

Ai tha se ka qenë i punësuar në Gjykatën e Qarkut në Prishtinë si bashkëpunëtor profesional, duke punuar si procesmbajtës, dhe mohoi kategorikisht se ka qenë asistent i Marinkoviqit. Sipas tij, gjyqtarja Marinkoviq ka qenë personi që “zhduku provat për masakrën e Reçakut”, ku humbën jetën 45 civilë shqiptarë. /noa.al