Gjykata e Posaçme ka reaguar zyrtarisht mbi lajmet për shkarkimin nga detyra të zëvendëskryeministres Belinda Balluku.

Më herët u raportua se kjo gjykatë speciale kishte dhënë dy masa sigurie për Ballukun, pezullim i ushtrimit të funksionit dhe ndalim i daljes jashtë vendit.

Gjykata e Posaçme për Korrupsionin dhe Krimin e Organizuar tha se është në kushtet kur masat e sigurisë kanë karakter sekret, ndaj nuk kanë një njoftim zyrtar për të ndarë me median dhe publikun.

“Lidhur me lajmin e publikuar në media për caktimin e masave të sigurisë ndaj Zëvendëskryeministres, znj. Belinda Balluku, në kushtet që masa e sigurimit kanë karakter sekret, gjykata në këtë moment nuk ka njoftim zyrtar për të ndarë me median dhe publikun. Në momentin e duhur procedural do të njoftoheni zyrtarisht nga ana e gjykatës”, deklaron GJKKO në reagimin zyrtar.

Shkarkimi i Ballukut nga gjykata erdhi pasi për herë të parë Prokuroria e Posaçme kundër Korrupsionit dhe Krimit të Organizuar (SPAK) krijoi precedent duke mos kërkuar masë sigurie arresti me burg siç ka aplikuar në rastet e mëparshme.

SPAK e akuzon Ballukun për veprën penale “Shkelje e barazisë së pjesëmarrësve në tendera apo ankande publike” në bashkëpunim për skandalin e tunelit të Llogarasë.