Tiranë, 15 Nëntor 2025

Muçi Shaljani ka ndërruar jetë pesë ditë pas atentatit të ndodhur më 11 nëntor pranë rrethrrotullimit të Aeroportit të Rinasit. Ai po trajtohej në Spitalin e Traumës në gjendje të rëndë, pasi u plagos rëndë nga breshëria e plumbave që i mori jetën në vend shokut të tij, Gilmando Dani.

“Në vijim të informacionit të dhënë më datë 11.11.2025, mbi ngjarjen e ndodhur tek rrethrrotullimi i Rinasit, ju informojmë se shtetasi M. Sh., i cili mbeti i plagosur, ka humbur jetën gjatë natës”, njoftoi policia.

Dani dhe Shaljani u qëlluan me breshëri kallashnikovi sapo dolën nga rrethimi i aeroportit. Tre autorë të maskuar, që udhëtonin me një automjet, zbritën dhe hapën zjarr ndaj makinës “Mercedes-Benz” të bardhë që drejtohej nga Shaljani, i cili prej shtatorit ishte bërë pjesë e AMP-së në një procedurë të kritikuar për shkelje të ligjit.

Autorët u larguan menjëherë pasi u siguruan se shënjestra e tyre, Gilmando Dani, kishte mbetur i vdekur. Më pas, ata dogjën makinën e përdorur në atentat në fshatin Halil, së bashku me armët e zjarrit.