Specialistët e Policisë së Dibrës, nën drejtimin e Prokurorisë, kanë identifikuar dhe shpallur në kërkim një 32-vjeçar të dyshuar për tentativë vrasjeje në Bulqizë. Ngjarja ndodhi mbrëmjen e djeshme, kur A. T., 32 vjeç, u plagos në këmbë pas të shtënave me armë zjarri.

I plagosuri u transportua menjëherë në spital dhe ndodhet jashtë rrezikut për jetën.

Nga hetimet e kryera nga specialistët për Hetimin e Krimeve të Rënda dhe shërbimet e Komisariatit Bulqizë, dyshohet se konflikti ka ardhur si pasojë e një mosmarrëveshjeje të mëparshme mes palëve.

Autori i dyshuar, H. B., 32 vjeç, banues në Bulqizë, akuzohet për:

“Vrasja e mbetur në tentativë”

“Mbajtja pa leje dhe prodhimi i armëve, armëve shpërthyese dhe municionit”

Policia po vijon kërkimet për lokalizimin dhe kapjen e tij, ndërsa materialet procedurale janë referuar Prokurorisë për veprimet e mëtejshme ligjore.