Pas rezultateve të zgjedhjeve të pjesshme në pesë bashki të vendit, ku maxhoranca siguroi fitore të thella përballë kandidatëve të pavarur të mbështetur nga opozita, në radhët e Partisë Demokratike kanë nisur të ndihen tonet e pakënaqësisë.

Ish-deputeti Ervin Salianji ka reaguar përmes një deklarate publike, duke e cilësuar ditën e zgjedhjeve si “një ditë të zezë për demokracinë dhe të ardhmen e Shqipërisë”.

Sipas tij, vendimi që opozita të mos hynte në garë me kandidatët e saj ka treguar mungesë përballjeje dhe angazhimi.

“Opozita zgjodhi rehatinë në vend të përballjes, paqen në vend të luftës, qetësinë në vend të angazhimit,” – u shpreh Salianji.

Ai theksoi se pjesëmarrja e ulët në votime është tregues i humbjes së besimit të qytetarëve te politika dhe te institucionet.

“Qytetarët treguan se nuk besojnë më se me votën e tyre mund të ndryshojnë diçka. Kjo situatë i shërben qeverisë së korruptuar, sepse sa më pak njerëz votojnë, aq më e lehtë është për pushtetin të manipulojë e të vjedhë,” – tha ai.

Në vijim, Salianji pranoi se Partia Demokratike po kalon një periudhë krize të brendshme, duke humbur “pasionin dhe zemrën për të bërë betejë”.

“Prej zgjedhjeve të 11 majit e deri sot, nuk jemi në rrugën e duhur. PD ka humbur pasionin për të luftuar dhe për të lexuar drejt shpresat e qytetarëve,” – theksoi ai.

Deputeti demokrat bëri thirrje për ndryshim të menjëhershëm brenda opozitës, duke e cilësuar këtë si domosdoshmëri përballë një pushteti që e quajti “autokratik dhe të korruptuar”.

“Ka ardhur koha të ndryshojmë, mundësisht sot, jo nesër. Çdo orë e vonuar është karburant për autokratin,” – përfundoi Salianji.