Peshëngritësja shqiptare Enkileda Carja po vazhdon të shkruajë histori në sportin shqiptar. Vetëm pak ditë pas suksesit të saj të jashtëzakonshëm në Kampionatin Evropian për të rinj që u zhvillua në Durrës, ku vendosi gjashtë rekorde të reja evropiane, sportistja kuqezi ka shkëlqyer sërish, këtë herë në Lojërat e Solidaritetit Islamik që po mbahen në Riad të Arabisë Saudite.

Në garën e kategorisë deri në 63 kilogramë, Carja arriti të vendosë dy rekorde botërore për të reja, duke konfirmuar formën e saj të jashtëzakonshme.Në stilin e shkëputjes, ajo ngriti 97 kilogramë, ndërsa në shtytje arriti 116 kilogramë, duke hyrë kështu në librin e rekordeve botërore.

Përveç rezultateve sportive, Carja ka marrë edhe një nder simbolik në këtë event ndërkombëtar, pasi në ceremoninë e hapjes mbajti flamurin shqiptar, së bashku me peshëngritësin Ertjan Kofsha, një tjetër emër premtues i këtij sporti.

Kjo arritje e radhës e Enkileda Carjës është një tjetër dëshmi e nivelit të lartë që po arrin peshëngritja shqiptare në arenën ndërkombëtare.