Tiranë, 5 nëntor 2025 – Kreu i SPAK, Altin Dumani, ka komentuar zhvillimet e fundit pas marrjes të pandehur të zëvendëskryeministres Belinda Balluku dhe hetimeve ndaj zyrtarëve të tjerë të lartë. Në një intervistë për “Trialog” në RTSH, ai theksoi se për Prokurorinë e Posaçme “nuk ka të paprekshëm”, duke nënvizuar se pavarësia e hetimeve mbështetet vetëm në prova dhe jo në emra apo funksione publike.

“Që nga krijimi i SPAK, është treguar qartë se nuk ka të paprekshëm. Të gjithë janë të barabartë para ligjit, pavarësisht funksionit politik, publik apo fuqisë financiare,” deklaroi Dumani. Ai shtoi se është detyra e SPAK të ushtrojë ndjekjen penale ndaj çdo subjekti kur ka prova, ndërsa për të vlerësuar plotësisht suksesin duhet pritur vulosja e vendimeve në gjykata.

Lidhur me hetimin ndaj Ballukut, kreu i SPAK tha se njoftimi është bërë në momentin e ngritjes së akuzës, duke theksuar balancën midis transparencës dhe ruajtjes së sekretit hetimor. “Njoftimi u bë ditën që iu komunikua akuza,” tha Dumani, duke sqaruar se komunikimet e institucionit bëhen vetëm në fazat zyrtare të procedimit.

Ai mohoi gjithashtu zërat për një kërcënim ndaj prokurorit të çështjes, Alqion Premçi, duke konfirmuar mbështetjen e plotë ndaj tij dhe të gjithë prokurorëve të SPAK. “Asgjë nuk është e vërtetë për kërcënime. Prokurori Premçi ka të gjithë mbështetjen time dhe nuk më ka raportuar asnjë shqetësim,” theksoi Dumani.

Duke folur për prioritetet e SPAK, ai u shpreh se hetimet nuk ndahen sipas përkatësisë politike, por bazohen vetëm te provat. Përveç çështjeve të korrupsionit në nivele të larta, Dumani theksoi rritjen e hetimeve ndaj grupeve kriminale dhe bashkëpunimin e ngushtë ndërkombëtar në luftën kundër krimit të organizuar dhe terrorizmit.