Tiranë, 5 nëntor 2025 – Kreu i SPAK, Altin Dumani, ka reaguar pas vendimit të Gjykatës Kushtetuese për kryetarin e Bashkisë së Tiranës, Erion Veliaj. Në një intervistë për emisionin “Trialog” në RTSH, ai theksoi se verdikti i Kushtetueses nuk ndikon në hetimin penal që institucioni i tij po zhvillon ndaj Veliajt.

Dumani sqaroi se çështjet janë të ndara dhe se masa e sigurisë ndaj kryebashkiakut mbetet në kompetencën e gjykatave që trajtojnë dosjen penale. “Gjykata Kushtetuese ka patur në shqyrtim një objekt tjetër: shkarkimin dhe dekretin e Presidentit. Nuk ka lidhje me çështjen që ndjekim ne penalisht, nuk ka ndikim në hetimet tona apo masën e sigurisë që rëndon ndaj zotit Veliaj”, tha ai.

Kreu i SPAK nënvizoi se nuk mund të zbulojë më shumë detaje, duke shtuar se është gjykata kompetente ajo që vendos për vijimin ose jo të masave të sigurisë.

Vendimi i Kushtetueses la në detyrë kryetarin e Bashkisë së Tiranës, ndërsa rrëzoi dekretin presidencial për mbajtjen e zgjedhjeve të pjesshme në kryeqytet.