Kreu i SPAK, Altin Dumani, në një intervistë për RTSH, ka folur për herë të parë në mënyrë të drejtpërdrejtë mbi hetimin ndaj Zëvendëskryeministres Belinda Balluku dhe menaxhimin e dosjeve të ndjeshme nga institucioni që ai drejton.

Dumani tha se SPAK po vepron me kujdes maksimal për të ruajtur integritetin e hetimit dhe respektimin e të drejtave të subjektit nën hetim.

Ai sqaroi se njoftimi publik u bë vetëm në momentin kur akuza iu komunikua zyrtarisht Zëvendëskryeministres.

“Njoftimi u bë ditën që iu komunikua akuza,” — deklaroi Dumani, duke theksuar se SPAK kërkon të gjejë ekuilibrin mes transparencës dhe ruajtjes së sekretit hetimor.

Kreu i SPAK tha se informacionet për hetime të tilla ndahen publikisht vetëm në fazat formale të procedurës — në ngritjen e akuzës ose kur çështja dërgohet në gjykatë — dhe gjithmonë përmes kanaleve zyrtare të institucionit.

Sa i përket publikimit të përmbajtjeve hetimore në media, Dumani pranoi se rrjedhjet ndodhin shpesh pas komunikimeve ligjore me personat nën hetim ose me mbrojtësit e tyre:

“Nga verifikimet tona, kur media publikon përmbajtje të dosjes, rezulton se informacioni del në momentin kur ne komunikojmë me aktet me personat në hetim dhe mbrojtësit e tyre. Nuk përjashtohet mundësia që të ketë ndonjë rrjedhje nga vetë SPAK, por e kemi minimizuar shumë,” — u shpreh ai.

Në lidhje me raportimet për një kërcënim ndaj prokurorit të çështjes, Dumani i hodhi poshtë kategorikisht këto pretendime, duke shprehur mbështetjen e plotë për Prokurorin Enkeleda Premçi.

“Asgjë nuk është e vërtetë nga ato që thuhen për kërcënim ndaj prokurorit të çështjes nga ana ime. Prokurori Premçi ka mbështetjen time të plotë. Kam kontakte të shpeshta me të,” — tha ai.

Dumani shtoi se prokurori nuk ka raportuar asnjë shqetësim për ndonjë kërcënim, as nga Kryeministri dhe as nga persona të tjerë, duke nënvizuar se çdo prokuror është i pavarur dhe përgjegjës për hetimet që drejton.