SHBA | 5 nëntor 2025

NVIDIA ka hyrë në histori si kompania e parë private në botë që arrin vlerësim tregu prej mbi 5 trilion dollarësh, duke u shndërruar në një prej fuqive më të mëdha ekonomike dhe teknologjike globale. Në qendër të këtij transformimi qëndron Jensen Huang, bashkëthemelues dhe drejtues për 32 vite, i cili sot zotëron pasuri mbi 180 miliardë dollarë — një histori që shkon përtej ëndrrës amerikane.

Historia e Huang fillon si fëmijë emigrantësh nga Tajvani në SHBA, duke punuar punë të thjeshta si pastrues në restorante, përpara se të ngjitej drejt majës së industrisë së teknologjisë. Sot, NVIDIA dominon prodhimin e çipave të inteligjencës artificiale, duke furnizuar qendrat e të dhënave dhe superkompjuterët më të avancuar në botë.

Vlera e saj në treg tashmë është krahasuar me ekonomitë e fuqive botërore. Me kapitalizim 5.03 trilion dollarë, NVIDIA qëndron paralel me ekonominë e Gjermanisë dhe mbi Japoninë e Indinë, duke e pozicionuar si një aktor jo vetëm ekonomik, por edhe gjeopolitik.

Në kontekstin ndërkombëtar, dominanca e NVIDIA-s është konsideruar si kartë strategjike në rivalitetin teknologjik SHBA–Kinë. Exportet e çipave të saj në Kinë, më parë deri në 95% të tregut AI atje, tashmë janë bërë pjesë e negociatave mes Uashingtonit dhe Pekinit.

Në tregun amerikan, NVIDIA qëndron përpara konkurrentëve më të mëdhenj: Apple, Amazon, Microsoft dhe Google. Çipat e saj, të kombinuar me ekosistemin e mjeteve si CUDA — e përdorur nga miliona zhvillues — e kanë vendosur kompaninë si themel të inovacionit të epokës së inteligjencës artificiale.

NVIDIA ka nisur instalimin e 7 superkompjuterëve për qeverinë amerikane dhe pret porosi çipash me vlerë 500 miliardë dollarë. Ndërkohë, kompania po investon 1 miliard dollarë për rikthimin e Nokias në garën e teknologjisë 6G.

Huang mbetet i fokusuar tek zgjerimi agresiv i aktivitetit, nga qendrat e të dhënave dhe robotika deri te aplikacionet mjekësore dhe drejtimi autonom, për të siguruar që NVIDIA të mos pësojë fatin e gjigantëve të dikurshëm që ranë në harresë.

Por ndërsa inteligjenca artificiale përshpejton zhvillimin teknologjik, ajo po sjell edhe sfida të reja sociale. Valët e pushimeve nga puna në kompani botërore tregojnë një realitet të ri: epoka e IA mund të krijojë pasuri rekord, por edhe të thellojë pasiguritë për të ardhmen e punës njerëzore.

Sot, NVIDIA shihet si kompania më e vlefshme në planet, një motor i një industrie që parashikohet të arrijë 100 trilion dollarë. Dhe Huang mbetet simbol i epokës së re — ku inteligjenca artificiale jo vetëm prodhon teknologji, por edhe pasurinë më të madhe të njerëzimit: vetë inteligjencën.