Gjykata Kushtetuese del me njoftim për çështjen Veliaj, janë pezulluar zgjedhjet e pjesshme në Tiranë

Gjykata Kushtetuese njoftoi se pas pak do të dalë me një deklaratë zyrtare për mediat në lidhje me çështjen e padisë së Erion Veliajt kundër vendimit të qeverisë që e shkarkoi nga detyra si Kryetar i Bashkisë së Tiranës.

Në njoftimin zyrtar, Gjykata bën të ditur se kryetarja Holta Zaçaj do të sqarojë vendimin që lidhet me kërkesën e Veliajt për shfuqizimin e vendimit të Këshillit të Ministrave nr. 539, datë 25 shtator 2025, të cilin ai e ka cilësuar të kundërligjshëm dhe në shkelje të Kushtetutës.

Gjithashtu, Gjykata do të flasë dhe për shqyrtimin e dekretit të presidentit të Republikës nr. 350, datë 1 tetor 2025, që caktonte datën e zgjedhjeve të pjesshme për Bashkinë e Tiranës. Në fokus do të jetë vlerësimi nëse ky dekret është në përputhje me nenet 115/2 dhe 115/3 të Kushtetutës.

Deri në marrjen e vendimit përfundimtar, Gjykata Kushtetuese ka pezulluar efektet juridike të dekretit presidencial, çka do të thotë se zgjedhjet e pjesshme në Bashkinë e Tiranës nuk mund të zhvillohen derisa të përfundojë shqyrtimi i plotë i çështjes.

Deklarata e kryetares së Gjykatës Kushtetuese, Holta Zaçaj, pritet në orën 17:00, në ambientet e Gjykatës, dhe pritet të japë sqarime mbi procesin e shqyrtimit dhe arsyetimin ligjor të pezullimit të dekretit presidencial.

Njoftimi i Gjykatës Kushtetuese:

Ju njoftoj se sot, ora 17:00, Kryetarja e Gjykatës znj. Holta Zaçaj do të ketë një komunikim me gazetarët në lidhje me vendimmarrjen e çështjes me kërkues Erion Veliaj me objekt “Shfuqizimi i vendimit të Këshillit të Ministrave nr. 539, datë 25.09.2025 “Për shkarkimin nga detyra të Kryetarit të Bashkisë Tiranë, z. Erion Veliaj”, si i papajtueshëm me Kushtetutën e Republikës së Shqipërisë”. Shfuqizimi i dekretit të Presidentit të Republikës nr. 350, datë 1.10.2025 “Për caktimin e datës së zgjedhjeve të pjesshme vendore për Kryetar Bashkie, për disa njësi të qeverisjes vendore”, për pjesën që cakton datën e zgjedhjeve vendore në Bashkinë Tiranë, si i papajtueshëm me paragrafin 2 dhe 3 të nenit 115 të Kushtetutës. Pezullimi i efekteve juridike të dekretit të Presidentit të Republikës nr. 350, datë 1.10.2025 “Për caktimin e datës së zgjedhjeve të pjesshme vendore për Kryetar Bashkie, për disa njësi të qeverisjes vendore”, për pjesën që cakton datën e zgjedhjeve vendore në Bashkinë Tiranë, në zbatim të efekteve pezulluese që paragrafi 2 dhe 3 i nenit 115 i Kushtetutës i njeh ankimit kushtetues të Kryetarit të Bashkisë, ndaj vendimit të Këshillit të Ministrave për shkarkimin, deri në marrjen e vendimit nga Gjykata Kushtetuese”.