Vlorë, 1 nëntor 2025

Një plagosje me armë zjarri është regjistruar mbrëmjen e sotme në fshatin Gjorm të Bashkisë së Selenicës, në qarkun e Vlorës.

Sipas burimeve nga vendngjarja, një shtetas rreth 35 vjeç është plagosur rëndë dhe po transportohet drejt Spitalit Rajonal të Vlorës për ndihmë mjekësore të specializuar.

Paraprakisht mësohet se i plagosuri ndodhej në banesën e djalit të xhaxhait të tij në fshatin Gjorm, kur ka ndodhur ngjarja. Ende nuk dihen rrethanat e sakta të plagosjes dhe identiteti i autorit të dyshuar.

Sipas dëshmive të para të banorëve, i plagosuri është me origjinë nga fshati Levan i Fierit.

Policia e Vlorës ndodhet në vendngjarje dhe ka nisur hetimet për zbardhjen e plotë të rrethanave dhe identifikimin e autorit të ngjarjes.