Berat – Vrasje për një kalë në Kala, 63-vjeçari Kristo Mema goditi me thikë dhe i mori jetën Keli Hoxhës nga Tirana

Një ngjarje e rëndë ka tronditur pasditen e sotme qytetin e Beratit. Rreth orës 15:10, në lagjen e Kalasë, një konflikt mes dy burrave ka përfunduar në tragjedi.

Sipas burimeve zyrtare, 63-vjeçari Kristo Mema, alias Kastriot Hoxha, banues në lagjen “Barrikadë” të Beratit, ka goditur me thikë 42-vjeçarin Keli Hoxha, banues në Tiranë, duke i shkaktuar atij plagë vdekjeprurëse.

Nga hetimet paraprake mësohet se sherri ka nisur për shkak të një kali që autori përdorte për të ofruar xhiro për turistët në zonën e Kalasë. Debati verbal ka degjeneruar në përplasje fizike dhe më pas në përdorimin e armës së ftohtë, që i mori jetën Hoxhës.

Policia e Beratit ka rrethuar zonën dhe po vijon kërkimet për kapjen e autorit të dyshuar, ndërsa grupi hetimor po punon për zbardhjen e plotë të rrethanave të ngjarjes.