Në Parlament, ndodhet që prej fillimit të seancës plenare, edhe kreu i SPAK, Altin Dumani, i cili pritet të ketë raportimin e fundit pasi brenda vitit i mbaron mandati.

Dumani pritet të raportojë për punën e institucionit që ende drejton, gjatë vitit 2024. Zyrtarisht Dumani nuk është i detyruar të flasë për punën e vitit në vazhdim, 2025, pasi është thirrur vetëm për raportin e 2024, por pas 20 minutash të fjalës së tij, është parashikuar një debat 150 minutësh, ku pyetjet e deputetëve mund të nxjerrin në seancë patatet e nxehta më të fundit, mes tyre, thirrjen në SPAK të zëvendëskryeministres Belinda Balluku.

Deri tani në këtë seancë po mungojnë kryeministri Edi Rama dhe krahu i djathtë i tij, Belinda Balluku.

Mungesa e tyre në sallë u perceptua nga opozita, sidomos nga kreu Sali Berisha, si shenjë e mungesës së përfshirjes institucionale në proceset e llogaridhënies publike, sidomos në fushën e drejtësisë dhe luftës kundër korrupsionit.

Kreu i Prokurorisë së Posaçme Kundër Korrupsionit dhe Krimit të Organizuar (SPAK) raporton në Parlament, mund të pyetet për këtë lajm të bujshëm të cilin më herët dje, z.Rama e komentoi me diplomaci.

Ndërsa mediat raportuan se Balluku është objekt hetimi nga SPAK për shkelje të barazisë në tenderë, Kryeministri Rama, i cili gjendej në Berlin në momentin e reagimit, u shpreh: “Nuk komentoj – drejtësia të bëjë punën e vet.”

Nga raporti i SPAK për 2024

SPAK regjistroi 186 hetime për korrupsion në vitin 2024 – një ulje e lehtë nga 214 në vitin 2023.

Nga këto, 139 çështje janë përfunduar gjatë vitit 2024, nga 150 në vitin paraprak.

Në nivelin e zyrtarëve të lartë publikë janë regjistruar 33 raste hetimi, nga të cilat 19 (52.9 %) janë dërguar në gjykatë me kërkesë për gjykim.

Raporti shënon se numri i çështjeve të përfunduara mbetet relativisht i lartë, çka tregon për një kapacitet hetimor që vazhdon të jetë aktiv. /noa.al