Kurti: Pa votimin e Qeverisë së re, Republika rrezikon të mbetet pa buxhet dhe institucione funksionale

Kryeministri në detyrë Albin Kurti ka deklaruar sot se asnjëra nga partitë parlamentare, të cilave u është bërë ftesë për bashkëqeverisje, nuk ka pranuar të hyjë në koalicion me Lëvizjen Vetëvendosje, ndonëse, sipas tij, vota e qytetarëve kishte përcaktuar një bashkëpunim të tillë.

“Po të pranohej oferta, sot do t’i kishim ofruar vendit qeverinë, madje do t’i kishim numrat që ta kalonim edhe sfidën e presidentit. Ky votim sot nuk është thjesht formalitet politik, por përgjegjësi shtetërore. Pa votimin e Qeverisë së re, Republika rrezikon të shkojë në zgjedhje të reja, pa shumë institucione funksionale dhe pa buxhet të miratuar për vitin e ardhshëm. Kjo do të nënkuptonte rrezikim të pagave për shërbyesit publikë, pensionet, shtesat për fëmijët, furnizimin me barna, si dhe funksionimin e organeve të rendit dhe sigurisë. Një vend pa buxhet është një vend që nuk mund të ecë përpara,” u shpreh Kurti.

Ai prezantoi edhe disa nga emrat që pritet të jenë pjesë e kabinetit të ri qeveritar në rast se qeveria merr votëbesimin e Kuvendit:

Zëvendëskryeministër dhe Ministër i Punëve të Jashtme: Glauk Konjufca

Ministër i Financave: Hekuran Murati

Ministër për Familje: Andin Hoti

Ministër i Mbrojtjes: Ejup Maqedonci

Ministër i Punëve të Brendshme: Xhelal Sveçla

Ministër i Administratës dhe Digjitalizimit: Lulzon Jagxhiu

Ministër i Arsimit: Avni Zogiani

Ministër i Kulturës dhe Turizmit: Fatmir Spahiu

Ministër i Sportit dhe Rinisë: Blerim Gashani

Ministër i Pushtetit Lokal (MAPL): Rasim Demiri

Ministre e Mjedisit: Fitore Pacolli

Ministër i Bujqësisë: Armend Muja

Ministër i Infrastrukturës: Dimal Basha

Ministër për Komunitete dhe Kthim: Nenad Rashiq

Ministër i Zhvillimit Rajonal: Sejnur Vej

Kurti theksoi se miratimi i qeverisë është i domosdoshëm për stabilitetin institucional dhe financiar të vendit, duke paralajmëruar pasoja serioze nëse procesi shtyhet ose dështojnë negociatat politike.