Në shumë prej familjeve shqiptare, gjella me mish është një nga pjatat kryesore të tryezës së përditshme.

Por, për të sjellë një shije të përsosur në pjatë, mënyra e përgatitjes është po aq e rëndësishme sa edhe vetë përbërësit.

Shumë amvisa, ndonëse me përvojë, mund të bëjnë gabime të vogla që ndikojnë ndjeshëm në cilësinë dhe butësinë e mishit.

Zgjedhja e mishit dhe përgatitja fillestare

Zgjidhni llojin e mishit që preferoni – viçi, qengji, keçi, apo pulë – por sigurohuni ta prisni në copa të vogla, më pak se një kafshatë. Kjo ndihmon në zierjen e njëtrajtshme dhe në thithjen më të mirë të shijeve.

Një truk i njohur për butësinë është lyerja e mishit me pak miell përpara se të skuqet. Kjo ndihmon në formimin e një koreje të lehtë, që mban lëngjet brenda copës së mishit. Megjithatë, është një hap opsional dhe varet nga preferenca juaj.

Procesi i gatimit – hapat që nuk duhen anashkaluar

Mos i kombinoni menjëherë të gjithë përbërësit. Fillimisht, kavërdisni mishin më vete me pak vaj ulliri dhe qepë. Vetëm më pas shtoni perimet si bizelet, patatet, kërpudhat apo bishtajat.

Zgjidhni zierjen e ngadaltë në zjarr të ulët. Ky është sekreti që mishi të dalë i butë dhe me shije të thellë. Shtoni ujë ose lëng mishi gradualisht, duke u siguruar që mishi të mbulohet mjaftueshëm gjatë gjithë kohës së gatimit.

Mos nxitoni! Gatimi i mishit kërkon durim. Mishi i kuq duhet të ziejë për të paktën dy orë për të arritur butësinë e duhur. Për mishin e bardhë, si pule apo gjel, 40 minuta mund të jenë të mjaftueshme – por jo më pak.

Gabimet që duhen shmangur

Gatimi në temperaturë të lartë – ndikon që mishi të forcohet dhe të humbasë shijen.

Shtimi i të gjithë lëngut menjëherë – më mirë ta shtoni pak nga pak.

Nxitimi me kohën e zierjes – gjella me mish është një pjatë që “s’do ngut”.