15 Tetor 2025, Milano, Itali- Një ngjarje tronditëse ka ndodhur mbrëmjen e së martës në Milano, ku modelja dhe sipërmarrësja italiane Pamela Genini, 29 vjeçe, është vrarë në mënyrë tragjike në ballkonin e një apartamenti në lagjen Gorla.

Autor i dyshuar i krimit është Gianluca Soncin, 52 vjeç, me të cilin Genini kishte një lidhje jashtëmartesore.

Ngjarja ndodhi rreth orës 22:00 të datës 14 tetor, dhe sipas autoriteteve italiane, Soncin e goditi modelen me thikë, duke i shkaktuar vdekjen në vend.

Pas krimit, ai tentoi t’i jepte fund jetës, duke u vetëgoditur me thikë në fyt.

Aktualisht ndodhet në gjendje të rëndë në Spitalin Niguarda të Milanos, nën kujdesin e policisë.

Fqinjët kanë qenë dëshmitarë të momentit tragjik, ndërsa autoritetet po vazhdojnë hetimet për zbardhjen e plotë të rrethanave.

Pamela Genini kishte ndërtuar një karrierë në modeling dhe sipërmarrje, duke jetuar mes Monte Carlos, Milanos dhe Dubait.

Së bashku me shoqen e saj Elisa Bortolotti, ajo kishte krijuar një markë veshjesh plazhi me emrin "EP SheLux".